Fjarkinn Bjarki

Við erum heimsmeistarar!

2005-12-21T14:41:00.000Z

Til hamingju Ísland. Við erum heimsmeistarar í fegurð. Við sendum stikkprufu af þjóðinni til Kína og unnum verðskuldað. Miðað við hvað við erum fá erum við allavega þúsund sinnum fallegri en t.d. bandaríkjamenn og þrjúþúsund sinnum fallegri en Kínverjar. Ég er fallegur. Þið eruð falleg. Við erum öll falleg. Í tilefni verðlaunanna birti ég hér mynd af Unni Birnu sem situr í sleða með hundinum sínum græna.

Jólin að koma og svona...

2005-12-16T00:53:00.000Z

Jahérna. Tíminn flýgur. Nú er bara korter í jól og maður veit varla af því! Ég sakna gömlu jólanna, þegar það snjóaði og leit í alvörunni út eins og jólin væru að fara að koma. Núna er bara allt grátt. Glatað. En annars er allt gott að frétta.

Ég er sumsé byrjaður í nýju vinnunni. Latabæ. Áður en þið spyrjið mig, þá skal ég bara svara þessum fyndnu spurningum fyrirfram. Nei, ég er ekki að fara að leika Sigga Sæta. Nei, það vantar ekki nýjan leikara til að leika Glanna Glæp. Og nei, nýja persónan sem ég á að leika heitir ekki Biddi Bumba. Þetta eru svolítil viðbrigði, enda er ég að gera töluvert aðra hluti en ég hef verið að gera. Það er erfiðara en ég hélt að kúpla sig út úr geðveikinni í bransanum hér heima.

Svo er hún Vala barasta gengin fimm mánuði með erfingjann! Kúlan stækkar óðum þessa dagana. Ég er m.a.s. búinn að finna spark. Það var mjög gaman. Það fylgir víst þessu tímabili meðgöngunnar að konur dreymi mikið. Völu dreymdi að ég hefði gert eitthvað af mér og vaknaði þvílíkt fúl út í mig að hún ætlaði ekki að vilja tala við mig í dag. Ég gat fátt sagt við því... Fyrirgefðu?

Sjónvarpsheilræði

2005-12-02T11:03:00.000Z

Af því að ég vinn í þessum tölvu/kvikmyndabransa, þá spyr fólk mig mjög gjarnan hvaða Plasma skjá það eigi að kaupa. Ég hef því almenna ráðgjöf fyrir fólk í þessum hugleiðingum. Ekki kaupa plasma skjá. Plasmaskjáirnir eru almennt með lægri upplausn heldur en gömlu sjónvörpin. Sparið peningana ykkar í bili. Það eru of miklar breytingar í gangi í þessum efnum núna og engin ástæða til að stökkva á eitthvað núna. LCD skjáir eru mun betri, en þú ekki orðnir nógu góðir ennþá. "En Bjarki, hvenær eigum við þá að versla þetta?" kunnið þið að spyrja. Svarið : þegar ég segi til. Watch this space.

Það er til svolítið í heiminum sem heitir tækni...

2005-12-01T14:39:00.000Z

...eins og hún Silvía Nótt sagði. Endrum og eins rekst maður á eitthvað sem er svo mikil snilld að maður á ekki til orð. Hér kemur eitt slíkt tæki.

Þetta lyklaborð er kannski í fyrstu sýn ósköp venjulegt, en í raun er hver hnappur skjár og breytist t.d. eftir hvaða forrit þú ert að nota. Þannig að ef ég er t.d. í klippiforritinu, þá sé ég hvaða hnappur gerir hvað og aftur ef ég fer í tölvuleik þá get ég séð hvaða takki skýtur, hver hleður byssuna o.s.frv. Þar fyrir utan getur maður valið sér flýtihnappa til vinstri með táknum að vild. Mig langar í þetta.

Núna.

Uppfærsla á Hjálmum

2005-11-25T14:58:00.000Z

Hjálmar fá nú einni stjörnu minna í einkunnagjöfinni minni. Eftir að hafa hlustað á plötuna þó nokkuð oft, þá finnst mér hún verða minna og minna spennandi. Mæli ekki lengur með henni. Mæli hins vegar með laginu "Your Missus Is A Nutter" með Goldie Lookin' Chain.

NFS

2005-11-19T09:29:00.000Z

365 Ljósvakamiðlar hafa nú opnað fréttastofu. Hún fór ekki vel af stað. Fyrir utan þessa týpísku tæknilegu örðugleika á opnunardegi, þá fékk ég á tilfinninguna að sumir hlutir hafi ekki verið alveg nógu útpældir áður en útsendingar hófust.

Þessi rauði litur á öllu er dauði. Hann er skær og frekur. Lógóið sem er uppi í vinstra horninu er í lagi, en of stórt og er sett þar fram á stórum rauðum kassa. Er þetta 1983, eða? Þar fyrir utan var textinn (sem er búið að laga núna reyndar) í Times, sem er kjánalegt fyrir texta sem rennur yfir skjáinn, og ég sá stafsetningarvillu þar í fyrstu frétt sem ég las (Parkinson er með einu s-i). Í þessarri fréttaslá neðst á sjónvarpinu rúlluðu svo sömu fyrirsagnirnar allan daginn. Ég sá fréttir kl. 12 og svo aftur kl. 19 og ekkert hafði breyst! Hafði ekkert gerst í heiminum á 7 klukkustundum?

Fréttasettin 2 sem ég hef séð eru annars vegar Lego settið, þar sem kassar eru á bakvið fréttamenn, en þeir skipta um liti virðist vera. Þegar þeir eru appelsínugulir, og appelsínugult myndefni á skjá fyrir aftan fréttamenn líka og fréttamenn húðlitir (eða appelsínugulir, eins og sumir verða eftir brúnkumeðferð) þá verður mjög undarlegt heildarútlit á þættinum.

Hitt settið er með gleri fyrir aftan fréttamenn og sýnir fólk vera að vinna. Þetta fór endanlega með það. Þetta er sérlega illa lýst og flatt og er virkilega óaðlaðandi. Eitthvað þarf að endurhugsa linsuvalið í þokkabót, því fólkið sem er fyrir aftan er of mikið í fókus og er bara truflandi. Ég vona að þeir reyni að bæta þetta, því þetta er allt ægileg afturför.

Ég vil fá mér kærustu

2005-11-08T09:50:00.000Z

Ég vil fá mér kærustu sem allra allra fyrst, en ekki verður gott að finna hana. Því hún skal hafa kinnar eins og hrúta ber á kvist og hvarmaljósin björt sem demanta. Og hún skal vera fallegust af öllum innanlands og iðin við að spinna og léttan stíga dans. Og hún skal kunna að haga sér hið besta.

Nýja Hjálmaplatan er frábær. Hún er talsvert ólík fyrri plötunni, því mér finnst meiri angurværð og dulúð svífa yfir þeirri nýju. Þeir eru ófeimnir við að nota öðruvísi hljóðfæri og mér finnst þeir vera að reyna að búa til sinn eigin hljóm með því, sem er hið besta mál. Djúpa bassalínan heldur sér enn, reggae-trommurnar og bullandi Hammondið stendur fyrir sínu. Mér finnst reyndar fyrsta lagið, "Ég vil fá mér kærustu", bera af hinum. Þetta er klárlega þriggja störnu plata (á meðan sú fyrri var í fjórum), en ég er búinn að hlusta á hana fjórum sinnum í gegn og er enn að melta hana. Mæli með henni.

Hverjir leysa glæpina?

2005-10-31T00:01:00.000Z

Ef maður ætlar að vera hot-shot lögga, hvað á maður þá að vera að gera? Samkvæmt C.S.I., þá eru það klárlega vettvangskönnuðir sem leysa glæpina. Law & Order deilir verkinu milli rannsóknarlögreglumanna og lögfræðinga. DaVinci's Inquest segir að krufningarlæknar séu að leysa málin. Og ef út í það er farið þá segir Judging Amy að maður eigi að vera dómari, og Hack leysir málin og er leigubílstjóri...

Ég bara veit ekki...

Meðalmennska og leikhús

2005-10-30T00:02:00.000Z

Það er búið að vera mjög mikið að gera undanfarið í vinnunni, en ég er að vinna hörðum höndum við að klára Galdrabókina, jóladagatal Stöðvar 2. Þetta er skemmtilegt og krefjandi verk, en er að taka mikinn tíma, enda þarf að skila fyrstu 12 þáttum eftir helgi.

Manchester United er orðið að Liverpool. 4-1 tap fyrir Boro í dag undirstrikaði það að United er orðið meðalliði í mesta lagi. Greinilegt að það er bara eitt gott lið á Englandi í dag. En ég stend með mínum mönnum og læt það ekki draga mig niður. Ef maður tæki fótbolta nærri sér, þá væru allir Púllarar þunglyndir.

Við Vala fórum með vinnunni hennar út að borða áðan og svo í leikhús á "Ég er mín eigin kona". Hilmir Snær leikur bráðvel í þessu stykki, og þótt sumir hafi greinilega búist við miklu grínleikriti, þá var þetta nokkurn veginn það sem ég hélt. Sniðug saga og vel leikið. Ef eitthvað má setja út á, þá finnst mér aðeins vanta að það snerti taugar hjá manni, en það er kannski þetta einleiksform sem dregur úr því. Þrjár stjörnur.

Kynni endurnýjuð

2005-10-23T16:05:00.000Z

Við Vala liggjum núna heima að horfa á Lord Of The Rings seríuna aftur. Snilld. Ég sagði einmitt við bumbubúann að hann fengi að horfa á þetta eftir tólf ár. Vala mótmælti og sagði þrettán til fjórtán. Ég sem hélt að foreldrar ættu ekki að draga úr hvoru öðru fyrir framan börnin sín!

Ég sló annars persónulegt met í síðustu viku þegar ég lét Ömma gabba mig í fótbolta á fimmtudaginn. Hann var búinn að lofa léttum bolta því ég var að fara annað um kvöldið en ég endaði með að spila stanslaust frá átta til ellefu. Ég er svo mikil hetja. Eða vitleysingur.

Þá vil ég ljúka færslunni með því að segja frá draumórum Jóhanns, frænda míns. Hann er efnilegur einræðisherra, það er á hreinu.

Þegar ég eignast bæ ætla ég að láta byggja húsin þannig að í loftmynd sé hægt að lesa nafnið mitt.

Snilld.

Kærkominn letidagur

2005-10-17T13:36:00.000Z

Það hlaut að koma að því. Í fyrsta skipti í laaaangan tíma fórum við Vala ekki út úr húsi í heilan dag. Sunnudagurinn var því vel þeginn í hvíld til að endurhlaða sig aðeins fyrir næstu viku. Ekki síst í ljósi átaka laugardagsins. Ég fór nefnilega til tengdó og var þar ásamt Atla og Ívari, bræðrum Völu að rífa niður baðherbergi. Þetta var fínt og hollt fyrir sálina að vinna svona vinnu, en þetta var nú samt drulluerfitt.

Ég vaknaði því í gær með ónýta hægri hönd þökk sé eymslum og blöðrum og harðsperrur á óvæntum stöðum. Þetta er allt að koma til. Hleyp þetta af mér í boltanum í kvöld. Að öðru leyti er lítið að frétta. Nema að ég þarf að ryksuga og skúra í dag. Öll hjálp vel þegin.

Klukk

2005-10-14T11:21:00.000Z

Gat verið. Frank klukkaði mig. Hann fær þetta í hausinn, það er á hreinu. Hér koma því fimm lítt þekktar staðreyndir um mig:

1. Ég hef einu sinni brotnað (ef frá eru talin tábrot í fótbolta). Þegar ég var lítill var ég að príla uppí glugga í þvottahúsinu í kjallaranum og hoppaði framaf, en rak hendina í þvottavélina. Ég skreið upp stigann grátandi og mamma og pabbi lögðu mig inn í rúm. Þau prófuðu að lyfta hendinni minni þegar ég svaf og þá kom bara skeifa. Klárlega brotinn. Mér fannst það samt fínt, því það var töff að vera með gifs.

2. Þegar ég var 15 ára stalst ég til að keyra bílinn hennar mömmu út í sjoppu. Það er svo sem ekki frá sögum færandi þar sem engin ljós eru á leiðinni eða neitt, en þegar ég ætlaði af stað heim, þá rakst ég í næsta bíl. Ég fékk næstum taugaáfall. Fór út og kíkti. Ekkert sá á bílunum og eigandi hins bílsins kom út, brosti bara og sagði mér að hafa engar áhyggjur, þeir hefðu varla náð að kyssast. Einmitt.

3. Ég hef aldrei keyrt mótorhjól. Ég væri alveg til í að prófa það einhverntímann, en ég hef ekki gerst svo frægur enn. Ég hef heldur ekki stokkið úr fallhlíf, en það er kannski ekki alveg það sama.

4. Ég þoli ekki pólitík. Þessar umræður og kosningar og allt þetta. Kræst. Þetta er eins og að fylgjast með málningu þorna. Ég hef augun opin fyrir ákveðnum hlutum, en oftast tekst stjórnmálamönnum að gera þetta bara að samdauna suði. Ekki tala við mig um stjórnmál. Ég hef ekki skoðun á því. Ég kýs sjálfstæðisflokkinn því mamma og pabbi gera það. Og því ég þoli Ingibjörgu Sólrúnu minna en alla aðra stjórnmálamenn.

5. Ég verð pabbi eftir 6 mánuði.

Ég ætla að hafa þetta alþjóðlegt klukk. Kalli í Dubai og Örn í Sheffield. Verði þeim að góðu.

Endurlífgun og sápuóperur!

2005-10-10T12:18:00.000Z

Ótrúlegt! Vefurinn er kominn af stað aftur! Til hamingju, heimur! Ég hef ákveðið eftir þriggja mánaða stefnumótun að þörfum þessa bloggs væri mætt með því að breyta aðeins útlitinu og segja eina góða sögu og blogga áfram. Þetta er mjög frumlegt lúkk, þótt ég eigi eftir að skella inn linkum og svona... Það kemur.

En sápuóperur. Þær eru spes. Og þær eru fyrir konur. Auðvitað horfir einn og einn strákur á Granna og allt það. Ég horfði meira að segja á Santa Barbara þegar ég var lítill. (Muniði ekki eftir Cruz og C.C. Capwell og þeim öllum?). En þá hef ég komist að því að ég fylgist með sápuóperum í dag. Og það af meiri áhuga en nokkur kona. Og karlmenn gera það mjög margir. Okkar sápuópera er fótbolti.

Fótboltinn er nefnilega ansi margþætt áhugamál. Við spilum hann sumir, inni í íþróttasölum. Margir horfa á hann í sjónvarpinu og svona. En þeir sem fíla sápuóperur, þeir barasta lifa fótboltann. Við fylgjumst með öllum viðtölum, hvað þessum leikmanni finnst um hinn, hver er að kaupa hvern, af hverju hann á að fara og hvern á að selja til að fjármagna það, af hverju Chelsea er sálarlaust krabbamein knattspyrnunnar og svo framvegis. Hvað er þetta annað en sápuópera? Ég fer nokkrum sinnum á dag á margar mismunandi fótboltasíður í leit að nýrri stórfrétt. Og þegar ég er ekki að gera neitt af þessu, þá spila ég Football Manager eða FIFA. Ég er gjörsamlega forfallinn. Ég ætla aldrei að gera grín að sápuóperum aftur.

Jarðarfararlög

2005-06-28T15:42:00.000Z

Vala var að velta því fyrir sér um daginn hvaða lag hún vildi hafa í jarðarförinni sinni. Efst á óskalistunaum hennar eru Simply Red lagið "If You Don't Know Me By Now (you will never, never ever know me)" eða "Komdu og skoðaðu í kistuna mína". Mér finnst bæði stórgóðir kostir.

Bubbi Hér & Nú

2005-06-27T11:33:00.000Z

Tímaritið Hér og Nú hefur slegið met. Þetta er lélegasta blað sem hefur verið gefið út á Íslandi. Jafnvel víðar. Þegar blöð gátu bara ekki sokkið lægra, þá kom þetta sorp. Bubbagreinin fræga, "Bubbi Fallinn" olli usla og Bubbi bauðst í gær til að berja ritstjórann (í boxhring, auðvitað). Ég vona að það gerist. Ég held með honum í þessu máli, þótt ég sé ekki Bubbafan. Hann fékk eitt stig fyrir þetta. Hann fær annað þegar hann hættir í Idol.

Pæling

2005-06-22T09:28:00.000Z

Við Vala ókum framhjá Vatnsdal um daginn. Menn sem búa í Vatnsdal eru Vatnsdælingar. Eru konur þaðan þá Vatnsdælur?

Giftur maður

2005-06-20T23:50:00.000Z

Loksins loksins. Ég hef ekki haft mikinn tíma til að sinna blogginu undanfarið, en núna kemur góður dálkur. Það vill líka oft verða þannig að þegar maður er ekki að sinna blogginu, þá safnast upp hlutir til að segja frá og maður nennir ekki að byrja. Vítahringur.

En jú, stóri dagurinn okkar Völu var 4. júní síðastliðinn. Í blíðskaparveðri giftum við okkur í Háteigskirkju, en sr. Pálmi Matthíasson gaf okkur saman. Athöfnin var nokkuð hefðbundin, en Pálmi stóð sig frábærlega, enda með eindæmum skemmtilegur prestur. Það kom mér samt svolítið á óvart hvað dagurinn var afslappaður. Það er nefnilega þannig að við erum búin að vera að undirbúa í marga mánuði, smátt og smátt, og svo þegar dagurinn kemur fer bara allt á auto-pilot. Við vorum með frábært fólk til að hjálpa okkur, og fá allir þakkir fyrir. Sr. Pálmi og Ragnheiður Gröndal sem söng eins og engill fyrir okkur (hún tók m.a.s. nokkur aukalög bara fyrir okkur pabba í kirkjunni áður en gestirnir komu. Ekki amalegt það!). Ömmi og Guðni Páll sem mynduðu fyrir okkur allt saman, bæði á videó og ljósmyndir, systkini sem mynduðu og sungu, Sissa ljósmyndari, Rúnar kokkur, Mummi Hermanns sem spilaði og söng, Lalli Popp sem stýrði veislunni, og allir sem gerðu daginn ógleymanlegan, ekki síst foreldrar og vinir.

En það sem ég átti kannski ekki von á var tilfinningaflóðið. Tilfinningin sem kom þegar kirkjudyrnar opnuðust og Vala gekk inn gólfið. Tilfinningin þegar ég setti hringinn á fingurinn hennar. Gleðistraumurinn sem flæddi um mann þegar við gengum út. Þessi víma entist svo allan daginn. Maður var eins og kóngur í veislunni við háborðið, umkringdur vinum og fjölskyldu. Þegar við komum heim eftir veisluna biðu okkar súkkulaðihúðuð jarðaber, kampavín, brauð og pestó. Frábær endir á frábærum degi.

Á mánudeginum eftir brúðkaupið skelltum við okkur til Krítar. Krít er snilld. Þetta er sólarströnd sem hefur ekki lata spánverja eða hrokafulla ítali. Ég veit ekki hvort grikkir eru allir svona þægilegir, eða hvort krítverjar séu svona sérstaklega viðkunnanlegir, en þetta var frábær ferð, þar sem við lágum í sólinni, dýfðum okkur í sjóinn og sundlaugar og slökuðum á. Við fórum eina ferð í sundlaugarennibrautagarð þar sem við vorum eins og smábörn í öllum rennibrautunum, og svo sigldum við til eyju sem heitir Santorini. Hún er mjög falleg, og ég skal fara að koma myndum á netið af öllu saman. Mér til halds og trausts var sólarvörn númer 30, svo ég yrði ekki eins og sólþurrkaður tómatur þegar ég kæmi heim. Enda fékk ég nú bara nokkrar freknur á meðan Vala er eins og henni hafi verið dýft í súkkulaði. Í afslöppuninni á ströndinni og við laugina las ég líka tvær Dan Brown bækur, þannig að ef einhver vill tala um þær, þá má það. Englar & Djöflar og Digital Fortress eru bækurnar. Vala er að byrja á Dan Brown núna. Er að taka Engla & Djöfla fyrst.

Á morgun tekur gamla rútínan við aftur. Vinnan og allt það. En eftir þetta frí, þá kvarta ég ekki. Þetta er búið að vera frábært. Að lokum vil ég þakka fyrir okkur aftur. Þetta var æði.

Loftspítali

2005-05-29T11:30:00.000Z

Þegar ég var að keyra fram hjá Landspítalanum í gær rifjaði ég upp gamlan pirring. Af hverju í ósköpunum heitir Landspítalinn Landspítalinn? Með einu essi? Er þetta ekki spítali landsins og þar af leiðandi Landsspítalinn? Eða er þetta bara einn af keðjunni, ásamt Loftspítalanum og Sjóspítalanum? Ég legg til að þessu verði bara breytt. Nema að einhver geti fært rök með þessu?

5 bestu plöturnar

2005-05-25T14:50:00.000Z

Þá er komið að því. Fyrsti topp fimm listinn, sem er að þessu sinni tónlistartengdur. Hér eru plötur sem mér finnst vera nánast óaðfinnanlegar.

RADIOHEAD - The Bends (1994)
Radiohead hefur sannað sig í seinni tíð, en þetta er önnur platan þeirra. Ég skal viðurkenna að það var ekki fyrr en OK Computer kom út að ég gaf þessarri annan séns, en fyrsta platan þeirra innihélt Creep - og benti til að þeir yrðu one-hit-wonder. En þessi plata þykir mér hafa staðist tímans tönn betur en hinar og því á hún fyllilega skilið sæti á þessum lista.

LED ZEPPELIN - Remasters (1990)
Á hljómsveitartímabilinu mínu fór ég, eins og allir unglingar í hljómsveitum, í gegnum gömlu böndin. Led Zeppelin eru algjörir meistarar. Þetta safn, sem er til í tveggja og fjögurra diska útgáfum er frábær innsýn inn í stórkostlega flóru rokktónlistar þeirra félaga. Nóg sagt.

SIGUR RÓS - Ágætis Byrjun (2001)
Framlag Íslands á listann minn. Þessi plata er ótrúlega góð og ég gat hlustað á hana aftur og aftur og aftur. Og get enn. Þetta var auðvitað á þeim tíma sem að Sigur Rós hafði metnað til að semja texta við lögin sín. Snilldarplata.

SOUNDGARDEN - Superunknown (1994)
Soundgarden er Seattle rokk í sinni flottustu mynd og er þessi plata inniheldur meistaraverk eftir meistaraverk. Fell On Black Days er í sérstöku dálæti hjá mér.

SMASHING PUMPKINS - Mellon Collie and the Infinite Sadness (1995)
Enn ein platan frá þessum tíma. Það bendir kannski til þess að maður hafi verið móttækilegastur fyrir nýrri tónlist þarna, enda músíkantinn í fólki að mótast á fullu. Billy Corgan og Jimmy Chamberlin hafa kannski verið mest áberandi í þessu bandi, en heildin sem er mynduð á þessarri plötu finnst mér frábær. Þetta er eiginlega bara tónverk.

Þá er þessi listi kominn í loftið. Það er stundum erfitt að velja, og ein platanna sem komst næstum því á hann er Slowhand með Eric Clapton, þannig að hún er í sjötta sæti á fimm plötu listanum. Njótið vel og lifið heil.

Vinsældalistar á bloggið

2005-05-24T09:29:00.000Z

Ég biðst afsökunar á að hafa ekki bloggað svona lengi, en það er búið að vera frekar mikið að gera undanfarið. Nú er lokahnykkurinn í brúðkaupsundirbúningnum búinn að vera í gangi og mikið að gera þess fyrir utan. Ég ætla hinsvegar að stofna til nýbreytni hér á blogginu, en ég ætla að hafa Topp Fimm lista í hverjum mánuði. Topp Fimm listarnir mínir verða fyrst og fremst tengdir kvikmyndum og tónlist, en eitthvað annað gæti kannski læðst með inn á milli. Fylgist með. Spennt.

Annars er skemmtilegt að minnast á að hér fyrir ofan vinnuna mína, við Garðastrætið, eru nokkur sendiráð og bústaðir. Þegar ég var að labba þar fram hjá sá ég opinn bílskúr við bústað rússneska sendiherrans. Það voru tveir menn fyrir utan skúrinn að þrífa svarta bíla, en inni í skúrnum var öllu skemmtilegri sjón. Þar var smiður að leggja lokahönd á smíði sína, en það var gullfallegur rugguhestur. Ég fór að hugsa að þetta væri eiginlega bara týnd list í dag, þar sem svona hlutir eru fjöldaframleiddir og seldir í IKEA, en þessi var virkilega vel smíðaður og smiðurinn fullkomnaði sýnina, því hann minnti einna helst á pabba hans Gosa (sem ég man ekki hvað heitir í augnablikinu). Fyndið.

Að lokum við ég óska Frank og Ösp til hamingju með soninn. Þar Frank heitir Frank, pabbi hans heitir Frank, og pabbi hans Frank (eða Franch), þá leyfi ég mér að fullyrða að sá yngsti muni heita Frank. Frank Magnús, en það er sá Frank sem á þann yngsta, gæti þá viljað gefa honum millinafn eins og hann er með sjálfur, og faðir hans Frank Úlfar hefur líka. Ég stakk því upp á Frank Bjarki. Hljómar vel OG það er auðvelt að stytta það niður í Fjarki ef þú ert að kalla á hann. Hugsið allavega málið.

Steggjun lokið

2005-05-09T16:06:00.000Z

Korter yfir fjögur. Mánudagur. Annar í þynnku. Eða öllu heldur annar í þreytu. Ég var heimsóttur af hersingu vina klukkan tólf á laugardaginn var. Þeir hentu í mig bjór, kipptu mér úr fötunum og skelltu mér í Elvis búning með tilheyrandi hárkollu. Þetta boðaði ekki gott. Ég var dreginn út í rútu þar sem ég var látinn æfa nokkra Elvis-slagara. Rútan nam staðar við Kringluna þar sem að ég var leiddur inn með kassagítar á bakinu og látinn syngja víðsvegar um verslunarmiðstöðina. Ég söng þó aðeins tvö lög af listanum, en það voru lögin sem ég treysti mér til að glamra á gítarinn, því ekki yrði söngurinn til að bæta eitt eða neitt. Þó varð þetta bara auðveldara í hvert skipti og endaði ég með að bjóðast til að syngja fyrir sætu stelpurnar í undirfatabúðinni. Þær gáfu mér líka kaffi. Þess skal geta að þótt það hafi orðið auðveldara að syngja í hvert skipti, þá skánaði söngurinn aldrei.

Að þessu loknu fór hópurinn allur út í Heiðmörk, sem mér fannst nú ekki boða gott. Þyrfti Elvis að húkka sér far í bæinn kannski? Sem betur fer ekki. Þar var ég tekinn úr þeim búning og settur í hermannaföt, því við fórum allir í byssó. Við vorum þar í rúma tvo tíma að skjóta hvorn annan með geislabyssum frá M16, en það var algjör snilld. Mun færri marblettir eftir það heldur en paintball ferðina sem ég fór fyrir nokkrum árum. Eftir þó nokkur hlaup (sem eru mun erfiðari eftir 5-6 bjóra) var farið aftur í rútuna og brunað í Laugardalinn þar sem að menn fóru í pottinn og sund, en þó var ég látinn fara nokkrar rennibrautaferðir og látinn keppa í kaffæringaleik sem var nokkurnveginn Steggur vs. Rest. Erfitt.

Eftir þá ferð fórum við á Madonnu að borða. Þar sátum við fjórtán eða fimmtán saman við þriggja manna borð og borðuðum hreint ágætis mat og hlógum mikið þrátt fyrir þrengsli. Þröngt mega jú sáttir sitja. Hópurinn fór að dvína eftir matinn, en við héldum flestir áfram skemmtuninni niðri í bæ. Við vorum á Hressó vel og lengi og stoppuðum svo við á gæðastaðnum Óðal, þar sem Gulli veitti rúmenskri strípistelpu andlegan stuðning. Mjög sérstakt. Hlöllabátur var lokahnykkurinn áður en við héldum heim. Stórkestlegur endir á stórkostlegum degi. Ég þakka enn og aftur fyrir mig.

Ný lög samþykkt

2005-05-01T00:22:00.000Z

Ekki tekið af mbl.is :

Alþingi samþykkti í dag lög sem banna foreldrum að fara með börnin sín með sér í verslanir eða aðra opinbera staða beint eftir vinnu, nema börnin séu útsofin. Börnin þurfa að vera hljóðlát og jákvæð, en ef annars mega foreldrar búast við sektum frá 5.000 krónum upp í 50.000 krónur, eftir hversu hratt það þaggar niður í börnunum. Ef fólk á grátandi tvíbura má það búast við fangelsisvist. Lögin voru samþykkt með 98% atkvæða.

Við erum flutt!

2005-04-25T14:24:00.000Z

Ótrúlegt en satt. Föstudagurinn var hrikalega erfiður. Eftir langan vinnudag sátum við kaupsamning og undum okkur bara beint í flutningana. Með okkur voru mamma og pabbi og bræður mínir, mamma hennar Völu, bræður hennar og Kristín og Dabbi og Dísa sem eiga sérstakar þakkir skildar fyrir aðstoðina. Hefðum aldrei getað þetta án þeirra. Sammi kom rétt nógu lengi til að fá pizzu. Svo fór helgin í að raða úr kössum, setja saman borð, hengja upp ljós og allt það. Þetta verður orðið flott um næstu helgi. Þá verður tekinn hvíldardagur með rauðvín og kveikt upp í kamínunni.

Töff starfsheiti

2005-04-14T16:12:00.000Z

Ég man eftir að Örn var mjög stoltur Domino's starfsmaður og var aldrei sendill, heldur "sérlegur sendifulltrúi Domino's Pizza á Íslandi". Mér þótti þetta vera mjög flott. En nú hef ég slegið þessu við. Ef ég væri sendill, þá stæði í símaskránni Bjarki Guðjónsson, heimsendir. Gaman að geta státað sig af því. Sem ég get ekki, en kannski að ég sæki um núna.

Mikið að gera!

2005-04-14T12:48:00.000Z

Já, nú er sko allt á fullu. Þegar maður er ekki í vinnunni, þá er maður heima að pakka. Þegar maður er ekki að pakka, þá er maður í brúðkaupsundirbúningi. Þannig að ég vona að pöpullinn afsaki mig þótt ég bloggi ekki nóg þessa dagana. Við erum sumsé að vonast til að fá afhent um miðja næstu viku og flytja helgina á eftir. Ég hlaka til að sjá þetta allt tilbúið. Annars er ég að fá einhverja kvefpest held ég. Dæmigert að fá hana á pressutíma. Akkúrat þegar maður hefur engan tíma til þess. En jæja, c'est la vie. Till next time, Bjarkovic out.

Fastur í neti

2005-04-08T09:24:00.000Z

Af hverju er sagt að maður eigi að sækja eitthvað á netið? Ætti það ekki að vera í netið? Maður myndi allavega tala um það með annarskonar net. Þá gæti maður líka sagt "æ, ég var bara fastur í netinu" í stað "ég var að hanga á netinu". Þetta sækir örugglega skýringu í ensku, þar sem er sagt "on the net" í stað "in the net" sem væri að sama skapi mun skemmtilegra. Ég legg til að við, fiskiþjóðin, í-um internetið. Ég ætla að byrja á því. Eða reyna það. Þetta er því fersta greinin sem þú lest í internetinu.

Leikarablogg

2005-04-08T09:22:00.000Z

Ég fór niður í bæ um daginn með nokkrum félögum og rambaði inn á Kaffibarinn. Þar stóð Ron Perlman á tjatti við eitthvað lið. Ég manaði vin minn til að labba upp að honum og segja "I loved you in Anchorman". En hann gerði það ekki. Hefði verið fyndið samt. Þeir eru nauðalíkir, Perlman og Ferrell.

Skömm fyrir þjóðina

2005-04-02T18:50:00.000Z

Fréttamenn RÚV eru þjóðinni til háborinnar skammar. Framkoma þeirra í fréttastjóramálinu er fullkomlega fáránleg. Ég hvet hvern einasta fréttamann sem hvatti Auðun Georg til að segja af sér til að segja af sér sjálfur. Ég neita að horfa á fréttatímann þeirra. Óháð fréttastofa minn rass.

Mjólkurgátan

2005-03-31T10:49:00.000Z

Hefur einhverjum manni tekist að setja akkúrat það magn af mjólk út á Cheeriosið sitt, að hún klárist á sama tíma og morgunkornið? Ég hef nú yfir 20 ára reynslu af að borða morgunkorn og mér tekst þetta aldrei. Yfirleitt set ég bara aðeins meira Cheerios útí mjólkina, og enda þá með að bæta í smá mjólk í viðbót. Hringavitleysa. Einhverntímann prófaði ég að setja áberandi litla mjólk útí. Ég er viss um að það var hæfilegt magn, en þá fannst mér ekki koma næg mjólk í skeiðina í hverjum munnbita. Þetta er flókið mál.

Mig rámar í að hafa heyrt einhvern útvarpsmann tala um þetta mál fyrir nokkrum árum. Hann sagðist vera með bestu lausnina. Hann setti bara mjólk útá kornið, borðaði, setti svo diskinn með afgangsmjólkinni á gólfið þar sem kötturinn hans tók við. Mér fannst ég mjög svikinn þegar ég heyrði þetta þar sem ég átti ekki kött.

Í morgun datt mér hug að setja bara smá kakó út í afgangsmjólkina, en ég var aðeins of þreyttur til að framkvæma þessa afbragðshugmynd. Þá fær maður allavega gott bragð af lokasopanum. Kannski að ég prófi þetta um helgina. Kannski ekki.

Samúð...

2005-03-22T15:28:00.000Z

...fær regnskógurinn sem var felldur til að anna pappírsflóðinu sem fylgir íbúðakaupum okkar Völu. Ég hef nú skrifað nafnið mitt á fleiri blöð en David Beckham. En það er kannski því ég get stafað mitt nafn sjálfur.

Ný íbúð

2005-03-21T10:10:00.000Z

Jæja. Það fór þá á besta veg á endanum. Við keyptum um helgina íbúðina í Grafarholtinu, nánar tiltekið í Þorláksgeisla 17. Við ákváðum að slá til og erum nú að vinna í sölunni á okkar. Það sem meira er, þá er fólkið búið að kaupa og er að vinna í að flytja, þannig að ég reikna með að við verðum flutt eftir um það bil mánuð. Hlutirnir gerast hratt þegar þeir gerast! Ég get ekki beðið eftir að flytja og biðja ykkur öll um að hjálpa mér. Múhahahahaaaa!

Íbúðastúss

2005-03-18T10:34:00.000Z

Rosalega getur fasteignamarkaðurinn verið frústrerandi. Við Vala ákváðum að skoða íbúðir og höfum fundið tvær sem okkur leist nógu vel á til að bjóða í þær. Sú fyrri var í Árbænum, en við vorum yfirboðin þar og vorum ekki til í neina keppni. Sú seinni er í Grafarholtinu, en verðið á henni er svo hátt að við erum fyrsta fólkið til að bjóða í hana, þrátt fyrir að þetta sé falleg íbúð. Tilboð okkar í hana rennur út eftir tuttugu mínútur, en ég er ekki bjartsýnn. Við fengum svo boð í okkar í fyrradag, en ætlum ekki að selja fyrr en við finnum eitthvað annað.

Ætli það endi ekki bara með að við tökum okkar af sölu og sláum þessu á frest fram á haustið og étum bara þessar 20% hækkun. Algjör antíklímax, þessi fasteignabransi.

Heilsurækt - dagur 3

2005-03-09T11:25:00.000Z

Fór í líkamsrækt í morgun með harðsperrur frá helvíti. Það var lyftingatími, einmitt það sem mig vantaði. Eftir tímann fór ég niður í Sporthús og fór í skvass með Árna Birni. Núna get ég ekki snert andlitið með hægri hendi. Ég er að blogga með tánum.

Idol skandall!

2005-03-08T09:19:00.000Z

Hér er bloggið sem gleymdist næstum því. Ég verð að lýsa frati á Idol dómarana, og þá sérstaklega Bubba nokkurn Morthens. Það er svo sem ekkert leyndó að ég hef haldið með Heiðu í gegnum þessa keppni. Nú eru þær bara tvær eftir, Heiða og Hildur Vala, en sú síðarnefnda er bakraddasöngkona af guðs náð.

Heiða naut framan af mikillar hylli dómara, og sumir vilja greinilega refsa henni fyrir að hafa staðið sig of vel strax í byrjun. Hildur Vala hefur bætt sig og er nú orðin ágæt. Karakters- og kraftlaus, en ágæt. En fyrir svona 2 vikum hættu dómararnir alveg að halda með Heiðu og skiptu yfir á Hildi Völu. Heiða barðist við að halda sér inni, en núna síðast þá söng hún sennilega besta þáttinn sinn. Og Bubbi Skorsteins gat ekki sagt annað en "flott". Hildur Vala söng líka, alveg ágætlega, en þurfti að þurrka slefið hans Bubba framan úr sér eftir lofsönginn. Ég er satt að segja á því að á þessu stigi keppninnar eigi dómararnir bara að segja sem minnst og leyfa fólki bara dæma fyrir sig.

Ég vona bara að Stöð 2 sjái að sér og stokki upp aðeins dómaratríóinu. Bubbi þarf að fara að einbeita sér að tryggingarlögunum sínum. Ég hrósa framtaki Vals Gunnarssonar, ritstjóra Reykjavik Grapevine, þar sem að hann jarðaði 20 Bubbadiska á lóð gamla Ísbjarnarfrystihússins. Sigga Beinteins má líka fara að hætta. Eina sem hún segir er "æðislegt átfitt!". Þetta er orðið gott.

Eitt að lokum. Idol-keppendur hafa verið dæmdir úr keppni fyrir að koma fram opinberlega, og Helgi, súkkalaðisöngvarinn að vestan, sem féll út fyrir 2-3 vikum mátti ekki taka starfi á Skjá Einum þar sem að hann er samningsbundinn Stöð 2 í gegnum Idol. Hvers vegna mega dómararnir þá gefa út plötur á meðan á Idol-keppninni stendur? Það er algjör smekkleysa. Fólk sem er að dæma aðra söngvara, jafnvel að moka skít yfir unga og upprennandi listamenn, að gefa út sín verk og óska eftir almennri hylli? Hell, no!

Íþróttadagurinn ógurlegi

2005-03-08T09:08:00.000Z

Við Vala erum nú byrjuð á átaksnámskeiði í World Class. Við verðum í fantaformi í brúðkaupinu! Þrír morgnar í viku, æfingar með lóðum og stöngum, mikið af armbeygjum og magaæfingum. Þetta er alveg það sem mig vantar. Lappirnar eru í fínu formi, þannig að þetta er góð viðbót. Eða svo hélt ég. Ég fór í fyrsta tímann í gærmorgun, á þeim guðlega tíma 6.30. Tíminn var nú bara hálfur í þetta skiptið þar sem allir voru vigtaðir og fitumældir. Við vorum því sendir á hlaupabrettin til að hita upp. Fyrst voru tekin lóð og æfingar með þeim, þar til hendurnar mínar voru að detta af. Þá voru teknar armbeygjur. Ég fann nú aðeins fyrir lóðunum í höndunum á mér í gær, en ég fór í tvo fótboltatíma í gærkvöldi og hugsaði að það hlyti að redda því, blóðið fer að renna og svona. En nei. Ég er með harðsperrur dauðans. Ég er að skrifa þetta blogg með tánum því hendurnar mínar eru svo lamaðar. En svona verður þetta í 8 vikur. No pain, no gain.

Það er dýrt að lifa

2005-03-01T15:17:00.000Z

Nú er spáð 20% hækkunum á fasteignaverði á höfuðborgarsvæðinu. Tuttugu prósent! Það er svakalegt. Manni finnst þetta bara vera að snúast út í geðveiki. Eru allir bara tilbúnir að skuldsetja sig til lífstíðar fyrir svona lagað? Það kemur mér eiginlega mest á óvart að leigumarkaðurinn sé ekki að breytast samhliða þessu. Það hlýtur eiginlega að gerast næst. Ég veit ekki hvað skal gera. Kannski er bara kominn tími til að flytja til útlanda...

Ég er nörd. (Grein fyrir aðra nörda).

2005-02-28T09:31:00.000Z

Ólíkt Jóni Gnarr, sem var það einu sinni, þá verð ég alltaf nörd. Ég er græjusjúkur með meiru. Apple græjur eru í sérstöku uppáhaldi hjá mér. Ég er reyndar þeirrar skoðunar að sumt af nýrri græjunum þeirra séu mistök, eins og iPod Shuffle og mac Mini. En þessi gæji er þokkalega með þetta á hreinu. Sony High Definition sjónvarp, DVD/VHS combo og digital tuner. Xboxinu hans var greinilega hent út í horn þegar mac Mini kom. En ég held að HDTV sé einmitt möst fyrir svona lagað. Mig langar í HDTV. Það er dýrt. Ég fæ ekki svoleiðis.

Hann er ekki sá eini. Einn geðsjúklingur taldi það vera góðan kost að makkavæða Lexusinn sinn. iLexus, geri ég ráð fyrir. Hvað er að fólki? En þó finnst mér snilld að geta notað iPod í bílnum og ég held þá að þessi lausn sé sú skásta sem er til í þeim bransa. Mig langar svolítið í svona fyrir bílinn minn, en læt iTrip FM sendinn minn duga í bili fyrir það.

Meiri nördneskja síðar.

Myndasíðan komin!

2005-02-27T22:17:00.000Z

Dyggir aðdáendur Bjarka geta nú glaðst yfir því að ljósmyndir fara nú að birtast frá honum á netinu! Já, Internetinu! Stórkostlegi vefurinn hans Kidda, augnablik.is, hýsir nú valdar myndir, og er hægt að kommentera á þær og allt. Njótið vel!

Þokan

2005-02-22T10:02:00.000Z

Mikið er gaman að þessarri þoku sem liggur yfir Reykjavík. Allt verður miklu dulúðlegra, þar sem að maður veit ekki hvað er framundan. Ég lagði bílnum í morgun smá spöl frá vinnunni til að forðast stöðumæla og labbitúrinn var mjög skemmtilegur. Það var mjög lítil umferð, sem er óalgengt hérna í miðbænum, og fólk gekk hljóðlega um. Mér leið eins og ég væri að labba um í Prag í kringum seinni heimsstyrjöld. Fríkað.

Annars keyptum við Vala okkur nýjan bíl í síðustu viku. Þetta er í fyrsta sinn sem ég kaupi sömu bílategund, og er það Audi til hróss, sérstaklega í ljósi þess að ég er alls ekki hrifinn af Heklu, sem er umboðið fyrir Audi á Íslandi. Þessi nýji er A4 eins og sá gamli, en með nýtt útlit. Hann er mjög huggó, silfurlitaður, leður, topplúga og 17" álfelgur. Mér líður eins og þingmanni þegar ég fer á rúntinn. Hann er nákvæmlega eins og bíllinn hér að neðan.

Nýtt áhugamál hjá Bjarkanum

2005-01-27T23:52:00.000Z

Úr því að hann GK, eða Gulli eins og kýs að kalla hann, bendir á myndir, þá ætla ég að deila með tryggum lesendum mínum nýjasta áhugamálinu. Eftir að hafa leitað vel og lengi að nýrri myndavél þá lenti ég loks á grip sem ég er hæstánægður með. Þetta er stafræn Canon myndavél af gerðinni 10D, og er hinn eigulegasti gripur.

Ég ætla ekki að fara út í þetta tæknilega mömbó-djömbó fyrir þá sem ekki hafa áhuga á því, en þeir sem hafa áhuga á þessu eiga bara að tala við mig um þetta; mér leiðist ekki að spjalla um þetta. Við Vala erum búin að eiga litla handhæga Canon myndavél í nokkur ár og hefur hún enst og virkað mjög vel. Mig er búið að langa frekar mikið í svona vél, og þegar rafhlaðan í litlu vélinni fór að gefa sig samþykkti Vala að kannski væri kominn tími á nýja. Hún er nú ekki farin að prófa þessa af neinu viti ennþá, en ég veit að hún fer létt með að nota þessa.

Nú ætla ég að vera duglegur að taka myndir og ætla að reyna að vera duglegur að setja þær á netið, hvort sem það myndagallerí verður hér eða á annarri slóð. Draumurinn minn er að setja upp vef þar sem ég get haft mín albúm og vinir og félagar geti sett eitthvað inn líka. Hann Kiddi vinur minn tók sig til og setti upp vefinn www.augnablik.is, en hann býður einmitt upp á svona þjónustu. Kíkið á það.

Þetta er því málið í dag. Farið nú öll út og takið myndir.

Er ekki kominn tími til að blogga?

2005-01-25T22:33:00.000Z

Já, þetta var erfið fæðing. En kominn tími á smá öppdeit því það hefur ýmislegt gerst síðan síðast.

Ég fór ásamt Guðjóni Elmari til London fyrir tveimur vikum. Við fórum til að fara á Chelsea-Manchester United, sem var mjög skemmtilegur leikur, þrátt fyrir að vera markalaus. Tveir strákar í London kaupa nær eingöngu DVD myndir, virðist vera. Við kepptumst um hvor okkar gæti keypt sér fleiri. Ég vann. (Myndirnar sem þú keyptir fyrir systkini þín telja ekki með)! Annars drakk ég bara bjór og Starbucks kaffi og skemmti mér vel þar. Og fékk mér Häagen-Dazs ís. Snilld.

Vikan eftir var ekki eins spennandi. Á laugardeginum átti að vera mikið afmæliskaffiboð, í tilefni þess að við Vala eigum bæði afmæli í janúar. Kaffiboðið einkenndist af fólki sem var fjarverandi vegna flensu og Völu, sem fékk flensu. Um þrjú-leytið var hún komin í rúmið. Mánudaginn eftir var ég orðinn slappur og lagstur um kvöldið, en því fylgir smá aukaskemmtisaga:

Ég var orðinn mjög þreyttur og slappur og sljór um sexleytið þegar ég loksins dröslaðist úr vinnunni. Ég fór niður í bílastæðahúsið í ráðhúsinu til að sækja bílinn og leitaði að staðnum þar sem ég átti að geta borgað með debetkortinu (ég spurði þegar ég fór inn, og það átti að vera hægt!) en fann ekki. Ég fór þá upp í móttöku og spurði hvort þeir gætu hjálpað mér. Þeir bentu mér á hraðbankann þar uppi og þeir gætu skipt í klink fyrir mig. Ég er einn af þeim sem ekki kann PIN númerið sitt, en hef það inni í gemsanum mínum. Hann var batteríislaus. Gahh. Ég dröslaðist aftur niður í bíl, þar sem mig grunaði að númerið væri líka til í fartölvunni minni. Ég settist inní bíl, kveikti á tölvunni og fann númerið. Ég gekk þá, eins glaður og hægt er miðað við að vera kominn með rúmlega 38 stiga hita aftur að móttökunni. Læst. FRÁBÆRT! Ég fór þá út og inn í Háspennu þar sem afgreiðslumaðurinn aumkaði sig yfir föla risann sem grátbað um að fá að taka út til að geta borgað stöðumælinn. Og þá var farið að kyngja niður snjó. Loks komst ég út úr þessu víti. Ég komst svo nokkrum dögum síðar að því að ég var með þúsundkall í veskinu.

Allavega. Ég lá alla síðustu viku í veikindum og rétt reis upp á föstudaginn. Við fórum okkur hægt og horfðum á Lord Of The Rings seríuna í extended útgáfu um helgina. Snilld.

Sérverzlanir

2004-12-29T09:27:00.000Z

Ef einhver efast um ágæti sérverslana, þá skal það útskýrt hér og nú. Ástæða þeirra er einföld. Karlmenn nota sérverslanir. Þegar karlmaður ætlar að kaupa sér bók, þá fer hann í bókabúð. Þegar hann vill kaupa skó fer hann í skóbúð. Ég áttaði mig á þessu þegar ég stóð í jólainnkaupum í Kringlunni. Ég veit að kærastan mín kýs að fara milli fjögurra búða og athuga verðið áður en hún verslar, en ég var ekki til í það. Reyndar keypti ég einu bókina sem ég keypti í Hagkaup, en það er bara undantekningin sem sannaði regluna.

Aldur og drykkja

2004-12-17T22:34:00.000Z

Ég hef tekið eftir því að þegar maður eldist fer áfengi öðruvísi í mann. Sumir segja að maður verði bara þynnri og þynnri, en ég held að það sé ekki endilega rétt. Maður er bara kominn úr æfingu. Þegar það var djamm allar helgar var þynnkan ekkert vandamál. Kannski var það af því að maður þurfti ekki að halda út "straight face" heldur gat bara sofið til þrjú og legið uppí rúmi. Núna drekk ég mun sjaldnar, en daginn eftir þegar maður er vanur að stökkva framúr hress, er maður núna frekar latur.

Ég lenti hins vegar í yfirþynnkunni í síðasta mánuði. Það er svo eftirminnileg þynnka að ég er varla farinn að þora að fá mér í glas enn. Við erum að tala um þynnku sem fær mann til að efast um lífsviljann. Vala fór meira að segja í veislu án mín og afsakaði mig (þessi elska), og ég lá bara heima í þynnku. Ég fór reyndar þann morgun að hjálpa pabba að bera gömlu eldhúsinnréttinguna út og sá fram á að æla yfir hana ef við myndum ekki nema staðar þá og þegar. Svoleiðis er það nú.

Vinnutörn á enda

2004-12-08T15:24:00.000Z

Síðustu þrjár vikur hafa verið geðveiki. Ég fékk það stórskemmtilega starf að setja saman nýju Stuðmannamyndina "Í takt við tímann". Ég átti alltaf von á að það yrði mikil vinna, en það varð aðeins lengra en það. Mest náði ég að sitja í 34 klukkustundir við tölvuna í einu á meðan á þessu stóð. En þessu er loks lokið. Myndin er tilbúin í filmuyfirfærslu núna og lokahljóðmix hefst á morgun. Ég vona bara að þetta verði allt búið í tæka tíð, því frumsýning á að vera annan í jólum. Myndin er frábær. Jor gonna lovitt, maður.

Fólk er fífl

2004-12-01T09:16:00.000Z

Jæja. Það hlaut að koma að því. Í morgun þegar ég fór út í bíl gat ég ekki opnað hurðina farþegamegin. Einhver hálfviti hefur keyrt á bílinn og rokið burt. Hvað er að fólki? Það kemur held ég bara tvennt til greina. Annaðhvort var þetta einhver að keyra fullur eða þá unglingur sem annað hvort hefur fengið hræðslukast við tryggingabónusinn sem hann myndi missa eða verið á bíl pabba síns. Örn Smári, vinnufélagi minn, benti mér réttilega á að tryggingafélögin eigi sök á því að fólk keyri í burtu eftir að rekast svona á aðra bíla með því að koma á hárri sjálfsábyrgð og láta fólk líða fyrir mistök með snarlækkandi bónusum. En nú sit ég eftir með sárt ennið, þarf að borga sjálfsábyrgð og missa bónus vegna þessa. Fólk er fífl.

Það er kalt á Íslandi

2004-11-22T21:13:00.000Z

12 stiga frost er ekki fyrir venjulegt fólk. Þegar ég fór út í bíl um daginn var svo kalt að þegar ég settist inn og jakkinn minn, peysan og bolurinn ákváðu að færa sig aðeins upp og láta berskjaldað bakið snerta gaddfreðið leðrið öskraði ég eins og smástelpa. Það var KALT. Ég hélt fyrst að húðin myndi festast við sætið, en ég held að það hafi bara verið of frosið til að gerast. Ég er að jafna mig á kalsárinu. Það var kalt.

Eiga þá ekki allir íslendingar bara að eiga bílskúr? Það er ekki eins og okkur vanti lóðir (þótt menn mættu kannski fara að hugsa aðeins lóðrétt svo að Reykjavík hætti nú að stækka). Maður á ekki að þurfa að þola það að fara í svona kaldan bíl og skafa og þetta allt. Koma bara í heitan bíl á morgnana og leggja honum í bílskúr í vinnunni. Ég ætla að finna mér hús með bílskúr og vinnu með bílskúr. Og hananú. Með bílskúr.

Fáránleiki dagsins

2004-11-15T19:12:00.000Z

...er aftur eign Stöðvar 2. Kosningarnar sem Ísland í dag er með eru framkvæmdar með SMS-i og kosta kjósendur 39 krónur per atkvæði. Hvað er málið með það? Mér finnst að ég eigi að fá 39 krónu inneign á GSM númerið mitt fyrir það eitt að horfa á þessa tvo jafnverstu sjónvarpsmenn landsins. Þetta van Damme look-alike og Jóhanna eru alveg off. Ég sakna Snorra Más og Guðrúnar Gunnarsdóttur. Ég var reyndar að frétta að Jóhanna sé að flytja til Danmerkur um áramótin. One down, one to go.

Robert Langdon

2004-11-15T13:15:00.000Z

Ég er núna rétt rúmlega hálfnaður með Da Vinci Code. Ég er að lesa hana á ensku, eins og ég geri yfirleitt nema annað sé óhjákvæmilegt. Bókin er, eins og mjög mikið af svona bókmenntum, mjög myndræn og er bara mjög stutt frá því að vera handrit. Það verður því ekki mikill vandi að gera góða mynd úr þessu. Ron Howard kemur til með að leikstýra Hollywood stykkinu og Tom Hanks er víst líklegur í að vera Langdon, aðalhetja bókarinnar. Ég sá samt fyrir mér einhvern aðeins meiri töffara. Kannski Dennis Quaid. Hann væri allavega ódýrari. Svo væri Natascha McElhone (Truman Show, Ronin, Solaris) franska dísin Sophie. Og Brad Pitt sem albínóann.

Ég hlakka allavega til að sjá þessa mynd. Ég klára bókina eflaust á næstu dögum og ætla svo í fyrstu Robert Langdon söguna um jólin. Það er sennilega eina bókin sem ég er væri til í að fá í jólagjöf. Jú, og svo nýjustu söguna... Vonandi er einhver að lesa þetta sem skilur ábendinguna.

Digital smigital

2004-11-09T11:10:00.000Z

Stafrænt sjónvarp er komið til Íslands. Það er reyndar löngu komið til Íslands. Margir klókir íslendingar hafa reddað sér Sky Digital tengingu heim, þar sem þeir hafa sett upp lítinn disk og horfa á enska boltann í widescreen og surround. Bíómyndir eru eins og spilaðar af DVD. Þetta er magnað stöff. En þetta undirstrikar hræsnina í Norðurljósum. Digital Ísland? Minn rass!

Fyrir þá sem ekki þekkja, þá eru til nokkur formöt sem unnið er á í dagskrárgerð og auglýsingagerð á Íslandi. Besta formatið er Digital Beta, eina alvöru óþjappaða stafræna formið sem hægt er að taka á á Íslandi í dag. Norðurljós eiga ekki Digital Betu. Hversu fáránlegt er að sjónvarpsstöð sendi út stafrænt merki, en geti bara spilað af "analog" græjum? Og senda þar að auki ekki út í widescreen.

Þrjú orð. Fá rán legt.

Textahöfundur Íslands?

2004-11-08T14:50:00.000Z

Ég fór ásamt Völu minni og vinum á tónleika á laugardaginn. Ný Dönsk og Sinfóníuhljómsveit Íslands. Þvílík snilld! Ég held því fram (og hef gert áður) að Björn Jörundur sé einhver besti textahöfundur sem við eigum. Það má vera að margir telji Megas eiga þann heiður, en ég er ekki sama sinnis. Ég varð seint hrifinn af Megasi, og þótt ég hlusti á lögin hans núna, og kunni að meta húmorinn og textasmíðina, þá er Björn skemmtilega ljóðrænn í sínum textum. Hlustið nú á diskana ykkar og hugsið um textana í leiðinni. Segið mér svo hvað ykkur finnst.

Svo gæti það náttúrulega verið bara Einar Bárðar...

Forseti og borgarstjóri labba inn á bar...

2004-11-04T09:48:00.000Z

Rosalega finnst mér leiðinlegt að fylgjast með pólitík. Þá er ég ekki að meina að ég segja endilega á móti pólitík. Það er frekar umfjölllunin sem mér leiðist. Gott dæmi er forsetakosningarnar í Bandaríkjunum. Ég var löngu búinn að mynda mér skoðun á frambjóðendunum, og þótt ég hafi verið hlynntur Kerry, þá komu úrslit kosninganna mér ekki á óvart. En svo eru þær búnar og heimurinn er hissa og hneykslaður. Get over it. Þetta er búið.

Svo er það Þórólfs saga Bensínmarkaðsmanns. Af hverju í ósköpunum á hann að segja af sér út af þessu máli? Hlutirnir vilja stundum þróast út í einhverskonar múgsefjun í þessum efnum og ég nenni ekki að heyra meira um það. Þetta eru svo óumflýjanlegar umræður að það er óþolandi. Ég er reyndar hlynntur því að hætta að versla á bensínstöðvum nema rétt til að koma bílnum áfram.

Þetta er kannski fréttafælni. Mér finnst allt í lagi að fylgjast með. Ég nenni bara ekki að eiga sama samtalið við fullt af fólki um hluti. (Nema það sé stórsigur hjá Manchester United þar sem Ruud van Nistelrooy skoraði fjögur mörk í sama Meistaradeildarleiknum). Kannski á maður bara að eiga fyrirfram útprentaðar skoðanir og dreifa þegar talið berst að ákveðnum hlutum. "Hvað segirðu? Þórólfur? Já, svakalegt. Hérna. Hér er blað með mínum pælingum. Lestu það á eftir. Tölum um stórsigur Manchester United núna..."

Hundurinn át heimavinnuna

2004-11-01T20:20:00.000Z

Mér datt allt í einu í hug þessi gamla afsökun (sem enginn hefur notað svo ég viti). Það getur varla neinn notað þessa afsökun í dag, eða allavega ekki mikið lengur. Nú er verkefnum bara skilað á tölvutæku formi. Sent sem tölvupóstur eða brennt á disk. Ég held að það væri kannski eini sénsinn að segja "hundurinn át USB-minnislykilinn minn". Pæling.

Að blogga eða ekki blogga.

2004-11-01T10:23:00.000Z

Jæja. Fyrsta bloggið. Merkilegur dagur í mannkynssögunni. Fyrsti nóvember, tvöþúsundogfjögur. Bjarki setti fyrsta bloggið í röð blogga sem átti eftir að breyta þróun heimsins á netið. Eða setti allavega lesefni á netið.

Það blogga nefnilega allt of margir. Ég hef því ákveðið að segja ekki frá því hvað ég geri á daginn eða ætla að gera, heldur frekar hvað mér finnst og hvað ég hugsa. Og brandara. Kannski að ég setji inn sögur, en BARA ef það er eitthvað sniðugt. Þetta er allavega stefnan. Það má því búast við að ég bloggi ekki daglega, en þetta verða gæðablogg. Gæði framyfir magn.

Nú þegar þú hefur lesið þetta fyrsta blogg, er best að þú spennir beltin því að þetta verður svakalegt. Eða skoðar bara aðrar síður. Það má líka.

B.